唔好誤會，我哋唔係參與每年一次、由維港走到政府大樓嘅遊行，而係去咗南丫島「遊」海灘、「行」小山～實在非常感恩，　神賜咗好天氣俾我哋，甚至好過龍添，個個曬到黑晒囉！XDD

本來想影多啲相，點知相機兩舊電明明喺前兩日叉好晒，影多幾影冇晒電= =，而家啲電池咁易老化嘅？

朝早，刺蝟去我屋企樓下接我食早餐，然後同大家喺中環會合，坐船出發去南丫島！

去到目的地，仍然要行一大段路至可以去到海灘，大威好有準備，佢帶埋沙灘墊俾大家坐，而我帶咗UNO同大家玩，喺晏晝兩點半，我哋開始行山！

佢哋好鍾意行山，而我本身唔鍾意……覺得黏立立又冇得沖涼，加上我體重有返咁上下，行山對膝頭負擔好重……加上喺以前落山路嗰陣，成日都滑親，仲爭啲滑落山坡添，諗喺都怕怕……但係佢哋話容易行，我太天真啦！啲路面幾安全嘅，但好多斜路= =

喺路上面，我有幾次抽筋，多得瑪珍幫我按摩，先至去到終點站，唔少得大威帶路，仲有刺蝟關心，所以唔想拖累佢哋！

不過流一身汗係幾好嘅，到五點半，平安地返到海灘，再同大家玩UNO！最後返尖咀食晚飯～

喺船上面，大家都瞓到成隻豬咁……大家渡過咗一個愉快嘅假日～

 媽媽係做通宵更嘅公屋保安，所以放工返黎嘅時間係早上八點左右。

媽媽同佢嘅同事分別守唔同嘅樓宇，故此對街坊嘅出入時間大概都有咁上下嘅意識。

今朝媽媽話哥哥成凌晨四點返到屋企，我問媽媽點解會知道，

照計哥哥返到屋企都唔會刻意打俾媽媽，

原來媽媽嘅情報網係咁厲害！就係佢啲同事通風報信……= =|||

哥哥同我都咁大個，照計媽媽唔會搵佢嘅同事check住我哋幾時返，

況且媽媽俾自由我哋，只要唔好咁過分就係～

（不過哥哥四點返，跟住又要返工就過分啲＾＾”）

喺媽媽口中得知，原來啲同事都幾多管閒事喎！

哥哥凌晨四點返屋企，媽媽嘅同事居然即刻打電話俾媽媽＠＠

駛唔駛咁呀！我哋又唔係細，況且媽媽都覺得佢哋煩啦！

就連我落街買少少嘢，佢啲同事都報告埋！

聽聽下覺得好搞笑，真係俾呢班師奶笑死XDDDDDD

不過今次佢哋睇錯啦～佢哋同媽媽講話我琴晚八點落街，

其實我琴晚食完飯之後一直都留喺屋企～～

唉～真係頂佢哋唔順呀！

不過算啦，我行得正企得正，咪由佢哋講囉！

順便俾佢哋幫我向媽媽報平安，哈哈～～